Kolnas?ta

Rēzeknes sinagoga voi Zaļuo sinagoga atsarūn Krāslavas i Izraēlas īlu styurī. Tei ir vīna nu senejuokūs kūka sātu Rēzeknē, i aplīcynuojums tam, ka sovulaik Latgolys sirdī dzeivuoja daudzi ebreju. Rēzeknē bejušs pat 12 sinagogys. Leidz myusu dīnom gon sasaglobuojuse tik vīna - Rēzeknes Zaļuo sinagoga. Šūvokor, 18. majā, jau divdasmitū reizi Latvejā byus starptautiskuo Eiropas muzeju akceja “Muzeju nakts”. Vīna nu vītu, kas itymā naktī byus atvārta interesentim byus ari Rēzeknes Zaļuo sinagoga, kur byus vareiba uzzynuot, kai sovulaik dzeivuojuši ebreji Rēzeknē i Latgolā, kū goldā lykuši i kai sadzeivuojuši ar latgalīšim. Kū latgalīši pajāmuši nu ebreju i ebreji nu latgalīšu, vaira zyna stuosteit sinagogas koordinators Voldemārs Ivdris. "Mes jau cytu reizi navarim pasceit, kur beidzās latgaliskais i suocās ebrejiskais," par ebrejiskuo i latgaliskuo sasaveišonu kai tradicejuos, tai volūdā, izteicīnūs i kulinārejā stuosta Voldemārs Ivdris. "Un jī runuoja latgaliski ar myusejim vysim latgalīšim. Jī beja draugi.