Radio Scriptura

Episode 1 van 'n nuwe reeks oor die Tien Gebooie.  Scirptura kyk na die Mosaïese verbond as bediening van genade.  Wat is sonde, en kan gehoorsaamheid aan die wet ons red?   In God se groot genade het Christus gekom om ons sondeskuld te betaal, sodat ons gered kan word.  Is die tien gebooie dan nou nie meer van toepassing op ons nie?  Waarom wil ons die wet nie meer hoor nie?   Wat is die drie gebruike van die wet? 

In Perspektief van Junie 2023, kyk Scriptura na drie sake in die nuus, naamlik die boikot aksie teen Woolworths oor LGBTQ produkte, die "real housewives" van die wynlande  televisie-reeks , en die regering se skikking met Solidariteit oor rasooreenkoms vir regstellende aksie in Suid-Afrika.

Wat is die vereistes vir 'n goeie teoloog?   Wat is die werk van 'n predikant?   Watter karaktereienskappe en vaardighede moet 'n predikant hê om sy werk tot eer van God en tot heil van die gemeente te beoefen?  Hoe dien teologiese opleiding om dit te kweek en te ontwikkel?  Is universiteite 'n produk van christelike tradisie?

Narsisme is selfverliefdheid.  Is daar hoop dat 'n narsis kan bekeer, en hoe?   Hoe gemaak as jy in 'n verhouding is met 'n narsis?  

Is bybelse voorbidding dieselfde as "intercession"?  Die woord van God roep gelowiges op om te bid tot ons hemelse Vader, en om alleen of in christen groepe in gesprek te tree met God vir alle geestelike en liggaamlike behoeftes, en in alle omstandighede.  Maar hoe definieër ons voorbidding, en is die lering vir alle denominasies dieselfde?  Wat is die onbybelse slagysters van hedendaagse "intercession"?  Is mensgerigte of mistiese voorbidding tot die nut en saligheid van medegelowiges? Waarin of in wie lê die krag van gebed dan eintlik?  Wees aangemoedig om saam te bid, maar tog waaksaam te wees en te onderskei tussen waar en vals.  Jesus Christus is ons enigste middelaar wat vir ons kan intree by die Vader, omdat Sy bloedoffer volmaak is.

Die Bybel leer ons dat God lewe gee, en lewe neem. Die sesde gebod is duidelik dat ons nie moord mag pleeg nie. Selfmoord is die wederregtelike beëindiging van jou eie lewe. Hoe verontskuldig ons hierdie daad waarin bloed vergiet is en waarvan 'n lewe geneem is? Depressie, trauma en geestesversteurings kan alles redes wees vir mense om hul eie lewens te neem, maar God is ons hoop en God is ons toevlug.

Scriptura gesels vandag oor vier onderwerpe in die nuus wat 'n impak op ons getuienis mag hê. Wat is die "Woke ideologie" besig om te doen?  Kanada se genadedood wetgewing.  Het Suid-Afrika se regering wapens aan Rusland verskaf?  Hoe moet ons ekonomiese druk en hopeloosheid benader en hanteer? 

Wat is medelye en empatie? Hoe moet christene empatie wys sonder om self ook deel van die probleem te word?  Hoe tree ons simpatiek op om bybelse  lig te werp op die beproewings en uitdagings?  Wat leer ons uit die bybel oor medelye as ons spesifiek na Jesus se lewe kyk? 

Kultureel en sosiaal het drankmisbuik so aanvaarbaar geword dat dit selfs ook in ons kerke ingesluip het. Vrye gebruik van alkohol in ons huise, skole, by die werk en sosiaal is besig om Suid-Afrika letterlik en figuurlik te versuip. Ons land is een van die grootste verbruikers van alkohol ter wêreld, en dronkenskap is 'n massiewe probleem op alle vlakke van ons samelewing. Is drankmisbruik 'n valse ontvlugting, 'n wye vergryp en 'n geheime afgod? Dit mag wel al drie wees, maar alkohol is op sig self ook nie die probleem of die antwoord op ons lewenskwessies nie. Wyn en bier is nie die sondaar nie. Sonde en gebrokenheid is die werklike probleem. Jesus is die volkome verlossing en vervulling van die mens se hart, en die bybel roep ons op tot nugter denke om ons lewenskoers op aarde te hou. God se genade is vir ons genoeg.      

Wat is jou werk vir jou werd?  Is jou werk die middelpunt of die rede vir jou bestaan, of is dit iets waarmee jy God dien en ook daarvan kan rus in God?  Wat dryf jou?  Wat regeer jou lewe? Wat is die bybelse beginsels vir werk en waarin kan gelowiges rus? 

Scriptura gesels oor twee nuusgebeure wat tydens April 2023 plaasgevind het. Die kruistog gehou op Goeie Vrydag in Vredefort - kan ons vir God iets teruggee as bewys dat ons Sy genade dankbaar is, of is Christus en die lewendige verkondiging van die evangelie genoeg vir die kerk? En die NG Kerk Vrystaat bly vir eers deel van hul Algemene Sinode, en wil werklik nog in gesprek gaan oor die bestaan van die bose, en die ontmitologisering van Genesis 1 tot 3.

Hoe help ons iemand wat met transgender kwessies worstel? Het jy die gevoel of 'n innerlike stryd dat die geslag waarmee jy geskep is, nie jou ware identiteit is nie? Onthou daar is genade in die Here.  Die evangelie en die blydskap oor ons verlossing is ons hoop in Christus en dit is tot jou redding. Die Heilige Gees help ons om te breek met ons ou lewe. Soek die Here in jou stryd - vas en bid, vra God vir verlossing daarvan. Vertrou God om jou te verlos van jou sondige begeertes, want Hy is getrou aan Sy beloftes aan Sy kinders, en Hy bring herstel.

Wat is boeliegedrag?  Hoe moet ons dit hanteer en aanspreek in skole en in die samelewing?   Nie alle konflik is boeliegedrag nie, en nie alle boeliegedrag is konflik nie. Die een wat hom- of haarself verhef tot 'n hoër vlak as ander mense deur hulle te boelie, moet die gevolge en die straf dra, ten einde negatiewe gedrag te stop. Ongeregtigheid moenie ongestraf bly nie, maar boeliegedrag is meestal 'n hulpkreet wat deur middel van 'n pastorale pad kan herstel en die boelie tot bekering te roep, en die slagoffer te help om dit te verwerk en te vergewe.  Vra die Here vir wysheid sodat jy sal weet wanneer om te vlug, te veg, te vertel of te verduur.  Maar erken en belei jou sonde as jy self aan afknouery skuldig is, en as jy geboelie word, skuil by die Here.

oet christene die TV reeks, The Chosen, waarin Jesus afgebeeld word, kyk?  Mag ons enige afbeeldings van God of Jesus maak, aanbid of navolg? Waaroor gaan die tweede gebod, en wat leer die gereformeerde belydenisskrifte ons oor afgodery en afbeeldings van God? Het God mense of mensgemaakte afbeeldings nodig om Homself te openbaar? Die Seun is die beeld van God volgens Kolossense 1:15, en God wil Sy kinders deur die lewendige verkondiging van Sy woord onderrig.

Drie misverstande is onder bespreking oor Romeine 8:28. Sal alles altyd goed gaan met die kinders van God? Sal dit progressief beter en beter gaan hoe liewer en liewer ons God het? Nee, want die evangelie is nie goedkoop nie, en hoofstuk 8 van Romeine gaan eintlik oor lyding, beproewinge en verdrukking. Die lewe van ‘n ware gelowige is ‘n swaarkry proses. Genadiglik is ons reeds geregverdig in Christus se bloed, en daarom sal alles ten goede meewerk vir God se geliefdes. Ons swaarkry is die smal weg waarlangs God ons, deur Sy kragtige werk, in Sy koninkryk in bring - monorgisties. Hou moed, want die heerlikheid van die ewigheid is baie groter as die lyding wat gelowiges op aarde beleef.

Scriptura bespreek drie sake vanuit 'n bybelse invalshoek ten einde 'n christelike perspektief daarop te gee wat in drie verskillende dele van God se wêreld plaasgevind het in die laaste maand:    die Saddleback kerk van California is onthef van lidmaatskap by die Southern Baptist Convention vanweë hul ongehoorsaamheid aan die bybelse leerstellings oor vroue in die amp van predikant;   die leier van die  EFF politieke party, meneer Julius Malema, het godslasterlike uitsprake gemaak en die burgers van Suid-Afrika gedreig indien enige iemand hom sou teengaan tydens sy "nasionale stilstand" optog gehou op 20 Maart 2023, en dan het Uganda se president, meneer Yoweri Museveni, nuwe wetgewing teen die LGBTQ gemeenskap en beweging ingestel.  

1 Korinthiërs 4:20 " .... want die koninkryk van God bestaan nie in woorde nie, maar in krag."  Wat bedoel Paulus met hierdie vers?  Daar is verkeie  maniere waarop hierdie teks misbruik word:   mense fokus op die woorde en die vertoon van talentvolle predikers, en verwar dit met die krag van die Heilige Gees.  Kan ons dan die krag van die Heilige Gees isoleer van die drie-eenheid, en Hom gelyk stel aan die krag van God?  En aan die ander kant steun mense soms slegs op dogma, eksegese en leerstellings om menseharte te verander. Hoe kan dit wees? Stel ons woord en krag teen mekaar op? Geloof is tog vertroue in Christus EN kennis van God. Maar wat is die krag dan waarvan Paulus hier skryf? Die evangelie van Christus is die krag van God tot redding vir elkeen wat glo.  God roep ons, en Hy roep ons deur Sy woord.

Die konteks van Psalm 37 wys dat ons nie moet fokus op en bekommer oor boosheid en kwaaddoeners nie, maar liewer ons fokus en vertroue op die Here moet plaas, want Hy sorg vir ons.  Die hoof boodskap van Psalm 37:4 is nie eintlik die begeertes van jou eie misleidende hart nie, maar liewer dat God jou fokus moet wees, en dat jy jou in Hom moet verlustig in hierdie lewe.  Wat is die geestelike vrug wat gebore word uit onreg en moeilike omstandighede?  Gemeenskap en verbondenheid met God, ons Vader, is die ryke herstel wat ons geniet as ons Hom bo alles in ons lewe aanbid.  God maak Sy begeertes joune.

Waaroor gaan "'n oog vir 'n oog en 'n tand vir 'n tant" regtig? Gee dit ons  vrypas vir persoonlike vendettas, of is die vers vir die regeerders, om sodoende toepaslike straf toe te pas? Het ek die reg om die reg in eie hande te neem, en myself te laat geld?  En hoe moet christene misdaad benader, en moet ons dit aanmeld?  Kan ons wraak neem as ons te na gekom word, of moet ons die wraak aan God oorlaat?  Vervul die kerk haar profetiese taak teenoor die regering?  Laat ons vir alle mense bid, en veral vir die regeerders, om reg en geregtigheid van God te smeek. 

In hierdie perspektief episode gesels Scriptura oor die Asbury herlewing, die kerk van Engeland wat gender neutrale terme vir God oorweeg, en die sataniese vertoning by die Grammy toekennings.